黛安
黛安

領展Office種生菜 裝飾完再食

發佈時間: 2015/09/02

領展Office種生菜 裝飾完再食

嫌辦公室略欠生氣?好多人會在枱頭種棵小盆栽或插朵花。種生菜?真是鮮有聽聞。直至昨日收到領展公關的電郵,才知道有人真的會在辦公室種生菜裝飾兼食用!

話說領展的觀塘總部有幅植物牆,以前種開一般裝飾類植物,不過最近「升呢」,變成一幅加設特製風櫃的水耕菜牆,令領展成為為全港首個在辦公室種植有機水耕菜的企業,認真巴閉。黛安聽領展可持續發展總經理關凱臨博士講,套水耕菜種植系統採用高效能慳電燈,水及營養液循環再用。有領展的姊妹向黛安笑稱,菜櫃的溫度、濕度等均由電腦系統調校,慳水慳力就能坐享其成。

據講公司為菜牆挑選農作物時好着重觀賞價值,最後入圍的佳麗有形態直立、葉片彎曲的羅馬生菜,以及大大棵、顏色鮮綠的四季生菜等,既可裝飾,長大後又可食用,一舉兩得。

一般來說,水耕菜苗生長約20日就可食用,而呢幅牆每次約可收割250棵菜。領展正諗緊點樣處理呢批定期收成,包括畀同事競投再將收益捐畀慈善組織;又或者贈予最落力做義工的同事。大家覺得邊個方案好啲?

撰文: 黛安 消息特靈八卦公關
欄名: 八卦名利場