領展推泊車App 研增電子支付功能

領展企業傳訊及對外關係總監盧炳松（BC）向黛安預告，正籌備一個集泊車資訊及飲食優惠的手機程式。話咁快，新App「泊食易」昨日正式出爐。

昨午領展請食飯，一坐低，BC便叫黛安攞手機來下載新App試用。此App絕對是駕駛人士的恩物，一打開，程式自動自覺向你顯示附近的領展停車場有幾多車位剩低；若泊位爆滿，仲會話你知最近的領展泊位，導航帶你去，相當人性化。

內設着數優惠券

飯後他又帶黛安到停車場參觀，原來天花暗藏玄機。抬頭望，每隔三、四個車位便有一個白色小盒，內裏裝着藍牙定位儀器Beacon，駕駛人士開着手機藍牙，便能對應有關裝置，記錄低自己架車泊咗去邊，攞車時不用左搵右搵。首階段暫有六個停車場設此服務。此外該App亦電子優惠券等着數資訊。

據講個App由領展耗費百多萬元請人開發，BC話又話會研究加入電子支付功能，希望做到開住個App在領展商場消費，便可賺取積分，用作預約車位及食肆等位之用。

他透露目前正與相關企業洽商電子支付服務的詳情。黛安問那豈非很快成事？他笑言：「談戀愛，只有自己話結婚唔得，都要雙方同意。」又自爆加入領展一年，絞盡腦汁籌劃「泊食易」等服務，搞到白頭髮多了。不過見到顧客用得方便，都是值得的。