迪士尼新景點 打造公主童話場景

香港迪士尼樂園近日喜訊一個接一個，上星期黛安收到風，樂園「迪士尼光影匯」夜間巡遊連獲兩獎，噚日又得悉，迪士尼10周年慶祝活動再有新消息，全新遊樂設施——「童話園林」即將同大家見面。聽講，新景點由丹麥珠寶品牌PANDORA呈獻，景點內將會有五位迪士尼公主經典童話故事的場景，唔知大家估唔估到邊位公主呢？黛安一聽到就好期待，下星期有機會率先睇，到時再同大家分享！

夜間巡遊 連獲兩大獎

講番連獲兩個大獎嘅光影匯，黛安每次同屋企人去都會預早搵定靚位，企定定係度，陪小朋友睇《怪獸公司》的毛毛「蘇利文」同你揮手，再同《美女與野獸》的貝兒飛吻。今次兩個世界級大獎，分別係世界主題娛樂協會（TEA）主題娛樂大獎的「傑出成就獎——巡遊演出」，同埋國際遊樂園及景點協會（IAAPA）頒發2015卓越大銅鈴獎「最佳多媒體演出」，難怪迪士尼樂園CEO金民豪都話，感到非常榮幸和鼓舞。