職訓局T Hotel入選中國Top 25酒店

黛安昨日同職業訓練局主席陳鎮仁食飯，首次踏進由職訓局實習學員及導師打理、位於薄扶林的T Hotel，感覺非常舒適。聽陳主席講，酒店前年三月成立，至今未夠兩年，已被著名旅遊網站TripAdvisor選為全中國Top 25最佳酒店的第七位。

除咗住宿舒適，酒店仲有一樣名物，就係「總理奶茶」。前年國務院副總理李克強訪港，曾參觀中華廚藝學院，睇學生沖奶茶。根據安排，領導人在外不會隨便飲食，但李克強聽見港式奶茶如此出名後，忍唔住試咗啖，自此學院所沖的奶茶就多咗個特別的稱號。

剛於上月履新的職訓局執行幹事、前民政事務局常任秘書長尤曾家麗，昨亦在場。佢與陳主席同黛安講，嚟緊職訓局最大發展之一，就係成立國際廚藝學院，將多國菜式的烹調技巧、品酒及配酒知識，加入為課程內容。

恒生展開80周年活動

另外，恒生銀行昨日於中環總行舉行新春團拜酒會，聽講共有二千幾人參加，係歷來最盛大，人數急升，全賴商業同企業客戶增加。

今年係恒生銀行80歲生日，黛安聽有份出席的姊妹講，酒會上安排咗多個攤位遊戲，內容都同生日有關。其中一個放滿金元寶的攤位，要求玩家用大湯匙撈起金元寶磅重，接近800克就可以攞獎品。除咗玩遊戲，大會仲預備咗幾十個「金財神」做大抽獎，祝大家財源滾滾。恒生銀行副董事長兼行政總裁李慧敏（Rose）同客戶打成一片，玩得非常盡興。

其實恒生80周年的活動，去年底正式展開，與電視台合辦的遊戲節目《決戰一分鐘》正是活動的頭炮，今年五月公司會在會展設大型酒會。咁正式生日係幾時？原來下月三日就係，管理層喺翌日的業績會有簡單的慶祝儀式。