網友作「點燈歌」 Lulu怕羞唔敢唱

「燈神燈神趣致的臉，你着波衫幾堅都會輸……」大埔Lulu（董嘉儀）最近紅到發紫，前日有網民將經典卡通《飛天少女豬事丁》主題曲的歌詞重新改寫，變成Lulu的頌歌《點燈一百次》，高唱她在世杯的「燈人燈事」。連Lulu昨日亦在自己facebook分享連結，仲問唱K時可否點這首歌。相信若她真是開金口獻唱，點擊率一定爆燈。不過Lulu昨向黛安謙稱自己歌喉「麻麻」，加上歌詞全部講自己，若然親自演繹會好難為情喎。

破燈有壓力 16強再測賽果

世杯開幕頭幾日，Lulu幾乎捧邊隊輸邊隊。最經典是星期日科特迪瓦對日本的賽事，上半場日本領先一球，Lulu在中場休息上載穿上日本球衣的洗碗照，結果下半場科特迪瓦2比1反勝日本，「燈力」驚人！不少網民都話睇住Lulu支燈做人，猛叫佢畀貼士，更聲言「首期靠晒你」。

可惜日前她在德國對葡萄牙一仗「破燈」（她力捧的德國罕有勝出），畀一班靠燈神搵食的球迷喪鬧，令Lulu壓力好大。佢日前在fb留言話自己估波係靠運氣，仲話自己燈唔燈只是一個話題，大家「何必認真」？

黛安昨致電她問候，她直言有少少唔開心，短期不會直接講支持邊一隊，會着住便服影相先，16強先再「出山」預測賽果。不過Lulu會留番些少貼士在專欄交代，想得到「神喻」記住留意《晴報》世界杯專版。