相隔4年男神回歸舞台劇 劇迷儲定錢睇子華法拉纏綿曖昧

「大眾男神」、「香港棟篤笑始祖」黃子華，千呼萬喚，又來了！子華昨日在fb個人專頁上載一段影片，宣布跟「高登女神」陳法拉演出舞台劇，大批引頸以待的粉絲即瘋狂追問詳情，更有粉絲留言要儲定錢撲飛。今次「子華神」強勢回歸，外間反應非常熱烈，大批粉絲話要mark實公開售票日期，就知男神魅力沒法擋。

子華繼12年演出舞台劇《野豬》後，不少粉絲都期待他再有新搞作，昨日終於傳來好消息，他將再演舞台劇。子華前晚已在fb個人專頁故作神秘：「聽日有嘢睇！」搞到粉絲議論紛紛，吊咗成晚癮，子華昨日終於上載一條一分鐘的預告片，原來係公告天下佢同陳法拉一齊演舞台劇。

暫定開18場

片中一開始就見到法拉，子華旁白：「佢係我老婆請嘅。」法拉則表示子華是她的舊老闆，又指第一眼看見子華就知道大家有啲嘢，意味兩人在劇中有曖昧關係；之後畫面轉到子華：「我老婆死咗，佢就反而走咗。不負責任。」法拉就話自己不想再見到對方，又指一切已經不同了，但子華沒有放棄：「佢唔喺度，我搵佢囉，我要一個交代、一個說法！」影片來到這兒便完結，為舞台劇留下伏綫。預告片上載短短一日，超過六萬次瀏覽，認真厲害。

其實子華和法拉去年曾合作演出電影《神秘寶藏》，由陳嘉上和鄭中基聯合執導，但電影至今仍未上映，不過無論如何，男神配女神這個組合已經夠晒噱頭。雖然子華上載的影片沒有透露舞台劇上演日期及地點，但昨日有消息傳出公演日期由7月1日至21日，逢周一停休，暫定演出18場，地點在灣仔演藝學院歌劇院，票價最高$880。以子華今時今日的地位，大批網民已計劃四出撲飛，有粉絲話已經等唔切好想睇。

子華今次棄棟篤笑轉戰舞台劇，原來是有段古，話說上周一，子華上過蕭若元的網台節目，他表示現今的香港社會已令他笑不出，本來想今年搞棟篤笑，但對香港前景太悲觀，所以度不出笑話，子華說：「我喺香港好多年，係一個地道香港仔，香港由一個我認識的香港，發展成今日的香港，我點能夠說一個香港的故事，再做一次棟篤笑。喺一個咁嘅狀況，我諗好多嘢已經笑唔出，唔知點笑。」

撰文：Pat、Iris、Steven

協力：采兒

編輯：黃寶恩

插圖：何樂

設計：鄧俊明