盧韋柏帶妻女焗曲奇 響應花旗義工日

噚日遇花旗集團香港及澳門區行長暨行政總裁盧韋柏（Weber），佢同黛安講，周末會帶太太同兩歲嘅囡囡去北角做義工，同基層小朋友一齊焗曲奇餅。佢之所以安排咁有意義嘅親子活動，全因今個星期六（22日）係花旗集團每年一度嘅「全球義工日」。Weber認為做義工係教育一部分，希望喺囡囡自細參加，對社會了解更多。

今次係花旗第八年於香港舉行「全球義工日」，過去七年累積已有萬五人參加過百項社區服務。適逢今年係花旗喺香港成立111周年，為表慶祝，仲特別將「111」化作主題「One Team, One Goal, One Community」！

服務惠及七機構

近年除咗花旗嘅同事外，連銀行嘅客戶都鼎力參與義工日，服務種類亦愈見多元化。以今年為例，服務範疇就涵蓋基層家庭、復康人士、長者服務、環境保育及社企發展，惠及七間社福機構。Weber笑言以往同人分享好容易，但如今活動太多怕記錯，要寫定紙仔提自己。

黛安噚日仲見到海洋公園保育基金高級發展經理黃麗媚（Josephine），首次參與花旗義工日嘅佢話，當日會帶義工去下白泥執垃圾，協助修復比恐龍更早出現、有「活化石」之稱嘅馬蹄蟹棲息地，之後仲會同義工講解馬蹄蟹嘅生長過程。而喺銅鑼灣足總嘅場地，仲會上演一場「花旗集團2013年慈善杯」，由社區組織協會及曙光足球隊等，與花旗嘅足球隊較勁，Weber笑稱比賽精采程度，話唔定同巴西洲際國家杯有得揮。