白滑肉背Vs制服誘惑 200磅細細粒完勝43吋長腿吳若希

無綫藝人細細粒（陳嘉佳）及吳若希日前分別在社交網上載玉照，200磅的細細粒在水療中心的按摩浴缸大騷「肉背」，穿護士服坐在道具病床的吳若希則獲封最索白衣天使。然而，今次宅男女神卻慘被KO，網友狂推身形肥胖的細細粒既自信又美麗，大家又可覺她為天下的肥妹一吐烏氣？

13年憑無綫劇集《老表，你好嘢！》正式殺入電視圈的細細粒，雖然噸位十足，但一向形象健康又搞鬼，她與林盛斌（阿Bob）已成為觀眾心目中的熒幕情侶，經常孖住拍廣告及登台搵真銀。此外，體重約200磅的細細粒經常在社交網上載靚靚自拍嘟嘴照，就連素顏照也敢於公開，絕對是充滿自信的肥妹仔。前晚細細粒又在社交網發布坐在巨型按摩浴缸背向鏡頭大騷白滑玉背的照片，網民高呼最期待的畫面出現了，激讚這是美人出浴。阿Bob昨晚亦唔執輸，上載半裸上身坐在梳化的照片，並留言：「呢啲先叫玉背呀唔該！」其實，阿Bob前日已上載一張與細細粒的工作照片，後者俯身大騷事業綫，噴血指數爆燈。

盼肥胖美成潮流

本報昨晚聯絡到身在汕頭的細細粒，她解釋騷玉背照片是攝於當地的水療中心，並由助手操刀拍攝。她說：「今次是有客戶邀請我和阿Bob到汕頭做司儀，安排我哋參觀水療中心，咁好嘢梗係騷畀人睇啦，自覺肥得嚟又開心、健康，觀眾又鍾意，咁咪幾好！」對於為肥人發聲，細細粒指外國不少雜誌都會挑選肥人做模特兒，她並稱：「肥人也有肥嘅靚同肥嘅性感，希望向網友傳遞呢個信息！」

另一邊廂，正趕拍新劇《實習天使》的吳若希於周日上載一張穿護士制服坐在病床邊的照片，並留言「護士都沒機會到病床上睡，但現在最想的就是攤在道具床上，然後盡情睡。」雖然她獲網友力捧是最美的白衣天使；但同時亦惹來不少醫護人員抨擊，痛斥其言論不尊重護士，有損外界對護士的形象。今次細細粒憑玉背完勝若希BB，未知能否殺出一條血路，獲無綫給予更多演出機會。

撰文：Steven、Pat

編輯：黃寶恩

插圖：何樂

設計：鄧俊明