渣馬有望「升呢」金標賽

最近約班姊妹出街，個個耍手擰頭，皆因她們都報名參加下月的渣打馬拉松，放假要預留時間操練。看來黛安明年亦要報名，否則同大家無晒話題。

借祖母身份參賽 取消資格

昨日與渣馬籌委會主席高威林食晏，他說今年賽事好墟冚，有七萬三千人報名，爭奪30萬美元（約234萬港元）獎金。自渣打97年首辦馬拉松，今日已變成國際盛事，大人細路都渴望參加。可惜因青少年的心肺負荷未必可承受長跑，大會只容許16歲以上人士報名。高威林告訴黛安，曾有「唔夠秤」的學生借祖母的身份證報名，最終被工作人員發現，當然要取消資格。聽講98年渣馬在新機場開賽時，更有家長揹住BB參賽。「他話要同BB一齊參與，但個細路就慘囉，大人一路跑，他就一路『蹬』。」旁邊的香港業餘田徑總會主席關祺話，研究舉辦短途賽畀小朋友參加，讓全城投入渣馬狂熱。

他們又話今年渣馬可望獲國際田徑聯合會認證做「金標」賽事。聽講要「升呢」，需符合「三個五」的規定：即有五男五女來自五個國家的頂尖選手參賽。咪以為好易，事關好多「跑得之人」都屬肯亞及埃塞俄比亞選手，選擇不多。他們目前已找到九名合適選手，成功在望。查實去年原本亦夠數，可惜有人臨時甩底，令「金標」變「銀標」，希望今年別再重演啦！