國泰100元機票 下周二瘋搶

今個星期旅遊界的最Hit話題，肯定是國泰航空以100元的激低價賣機票啦！國泰之所以咁大手筆，全因公司之前在權威性十足的世界航空公司大獎Skytrax，勇奪「全球最佳航空公司」的榮譽。為與港人同樂，下星期二將在「fanfares」網站賣大包，提供2,014張來往11個航點的100元機票（未連稅及附加費）。

去年推優惠 中午售罄

這批平價機票有兩大亮點：一是涵蓋倫敦、馬爾代夫、芝加哥、紐約及悉尼等長途航綫；其次，即使你的假期只足夠去大阪、名古屋、台北或吉隆坡等亦不用失望，事關今次優惠入面，國泰將向短途旅客提供商務客位！係咪好筍呢？

想平價去旅行，下星期二（26日）早上八點記住登入www.cathaypacific.com/fanfares搶購，每人限買機票兩套。不過大家留意，去年國泰為慶祝fanfares一周年，亦曾推出2,000張低至50元機票，同樣八點開賣，中午一點幾已全數售罄，黛安估計今年亦差不多。

回想過去多年，國泰益街坊的事時有發生。最難忘是沙士那年，全港一片愁雲慘霧，當年國泰牽頭舉辦「同心為香港」活動，免費送出一萬張機票為香港打氣；而香港回歸十周年，公司亦送出千張機票做獎品。無論經濟高低都有平嘢執。