唐英年佳釀 周五起拍賣

被《華爾街日報》譽為亞洲最大葡萄酒收藏家之一的前政務司司長唐英年，今個星期五、六會透過佳士得，將幾千支法國勃艮第（Burgundy）的佳釀拍賣，相信會吸引一批識酒之士競投。

今次拍賣名為「尋味之旅：唐英年窖藏珍釀」，早在上個月唐唐賣酒的消息一出，已吸引唔少傳媒報道。有人問佢係咪因為大宅地牢被封，所以割愛賣酒；亦有人關心佢係咪等錢用，事關呢批酒總值2,900萬，不過唐唐就笑住咁話：「都無幾多錢啫。」認真豪氣！

黛安睇過拍賣書上的序言，唐唐形容每次品酒都是一次難忘的經歷，而勃艮第酒在佢心目中更佔「永久的一席之地」，可惜勃艮第產量有限，要好似集郵咁逐支搜求。咁難得到，何以割愛？佢話自己的珍藏多到一世都飲唔晒，所以公諸同好喎。

絕版名釀具收藏價值

香港葡萄酒商會餐飲文化發展委員會主席黃大鈞（Alan）話，唐唐拍賣的佳釀中，尤以1978年Henri Jayer的1.5公升Vosne-Romanée Cros Parantoux最珍貴，事關釀酒師Henri Jayer又有「Burgundy之神」的美譽，其酒莊出名產量少、品質高，備受fans追捧。隨着這位大師幾年前過身，其名釀亦成絕版。

Alan續介紹，1978年是大師首度製作此佳釀的年份，極具收藏價值；而此酒更被日本葡萄酒漫畫《神之水滴》介紹過，加上唐英年的名氣，不排除最終拍賣價，會超出佳士得估值11至16萬元的上限。

另一批95年Romanée-Conti，六支1.5公升裝，估值達100萬元。聽釀酒師謝德蘭（Tersina）說康帝酒園一向產量少，95年亦是好年份，加上Henry一直存酒有道，估價亦算合理。