佳能搵麥兜 宣揚「墨兜」回收

周末為家中打印機換墨，打算將舊墨盒丟進垃圾桶之際，姨甥仔連忙阻止：「呢個『墨兜』可以回收㗎！」之後不但用廢紙把墨盒包好，仲話會幫手放入回收箱。問佢點知墨盒可以回收，佢笑笑口咁話，係麥兜教佢喎。

麥兜宣揚墨兜回收，係佳能香港（Canon）嘅宣傳好蹺。話說09年Canon已開始喺香港推行墨兜回收，將其分解再製成其他物料。前年開始走入學校，透過工作坊、展板同一啲教師錦囊，將環保列印信息傳播，因此今時今日，醒目嘅學生哥都知道墨兜可以循環再用。

138間學校響應

早幾日黛安經過置富都會時，剛好Canon正向參加墨兜回收的學校頒獎。當日佳能香港幾位高層，包括董事長及行政總裁美野川久裕、商務影像方案部高級總監及總經理馮少奇等都在場。佢哋同黛安講，今個學年全港有138間學校響應佢哋嘅墨兜回收活動，一共收集到過萬個墨兜，幫地球出一分力。

今年佢哋仲請學生哥創作環保漫畫，反應好好，收到4,000幾份作品，透過唔同嘅故事情景教大家點樣「墨」盡其用，麥兜創作人麥家碧睇完仲讚學生水準高。

其實Canon早喺90年，已喺中、日、美、法等地設立循環再造廠，廿幾年來節省咗數以萬噸嘅新資源使用同碳排放。香港雖然四年前先開始做墨兜回收，至今亦已回收1.3噸塑膠，減少咗2.3噸碳排放。咪睇小呢啲數字，其實已相等於100棵樹一年嘅二氧化碳吸收量㗎啦！