《晴報》社長美女相伴 歎GODIVA盛宴

「辣辣哋，仲有啲茶味！」GODIVA新出的「Saveurs Du Monde」系列朱古力予人無限驚喜，其中「花椒紅茶味慕絲黑朱古力」是黛安的至愛，甜中帶辛，味道刺激。

朱古力不但止可做甜品，用來煮餸一樣可口。最近GODIVA推新朱古力之餘，亦與麗思卡爾頓酒店合作，呈獻朱古力下午茶及廚師之桌，下月正式應市。多得GODIVA亞太區市場業務總監趙嘉曼（Carmen）邀請，黛安可提早嘗鮮。

亞太區百間分店

聽Carmen講，佢14歲同妹妹留學英國，畢業於牛津大學，是叻女一名，回港後做過十幾年marketing。她自言與食有緣，任職公司大都與甜品有關，曾効力Movenpick、金莎，兩年前加盟GODIVA，協助擴展亞太區業務，目前公司在中港台、星馬及印度等分店多達100間。

講番當晚餐飯，九道菜全與朱古力有關：朱古力照燒鰻魚、白朱古力乳酪龍蝦、朱古力北京烤鴨……配搭中西食材一樣合拍。全晚亮點要數由酒店行政總廚Peter Find親自操刀的唂古脆海鱸魚，Peter好有心機，將來自冰島的海鱸魚以燉牛肉汁來燴，魚肉鮮嫩肥美，再灑上炸脆的黑朱古力碎，造型十足湖南名菜豆酥魚，大家食到讚口不絕。

是晚食客幾乎是「全女班」，除了Carmen和黛安，仲有名食家楊崢及盧覓雪、美女廚神Kit Mak和小儀、前港姐謝寧和麗思卡爾頓酒店公關Vivian等九位靚女，唯獨《晴報》社長麥華章一位男嘉賓。盧覓雪及小儀打趣說，麥社長當晚比擁有七個老婆的韋小寶更威風。